Friday, September 17, 2010

བོད་རང་སྐྱོང་ལྗོངས་སྲིད་གཞུང་གི་སྒོ་ཁར་ཞི་བའི་ངོ་རྒོལ་བྱས་པ།

བོད་ལྗོངས་བོད་ལུགས་གསོ་རིག་སློབ་ཆེན་གྱི་མཐར་ཕྱིན་སློབ་མ་ཚོས་ད་ལོའི་ལས་ཞུགས་ས་མིག་བཀོད་སྒྲིག་བྱས་པ་དྲང་སྙོམས་མ་བྱུང་བའི་ཐད་བོད་རང་སྐྱོང་ལྗོངས་སྲིད་གཞུང་གི་སྒོ་ཁར་ཞི་བའི་ངོ་རྒོལ་བྱས་འདུག
ཟླ་འདིའི་ཕྱི་ཚེས་ ཉིན་བོད་ལྗོངས་བོད་ལུགས་གསོ་རིག་སློབ་ཆེན་གྱི་མཐར་ཕྱིན་སློབ་མ་ ༡༠༠ ལྷག་གིས་འབོད་ཚིག་འཕྲེད་དར་ཕྱར་བ་དང་ལག་ཏུ་རྒྱ་ནག་གི་རྒྱལ་དར་ཆུང་ངུ་རེ་བཟུང་སྟེ། ལས་ཞུགས་ས་མིག་བཀོད་སྒྲིག་དྲང་སྙོམས་མ་བྱུང་བའི་ཐད་མཉམ་རུབ་ཀྱིས་བོད་རང་སྐྱོང་ལྗོངས་ས་གནས་སྲིད་གཞུང་གི་སྒོ་ཆེན་ཁར་ཞི་བའི་ངོ་རྒོལ་བྱས་འདུགམོད། རྒྱ་ནག་གི་ཉེན་རྟོག་མི་སྣས་གནས་ཚུལ་དེ་སྤྱི་ཚོགས་སྟེང་རྒྱ་ཁྱབ་དུ་མི་འགྲོ་བའི་ཆེད་དུ། འཕྲལ་མར་སློབ་མ་ཚོའི་ལག་གི་འཕྲེད་དར་འཕྲོགས་ཤིང་སློབ་མ་ཚོ་ས་གནས་སྲིད་གཞུང་གི་ཞུ་གཏུགས་ལས་སྒྲུབ་ཁང་དུ་ཁྲིད་ཡོད་པ་རེད།
ཟླ་སྔོན་མའི་ཚེས་ ༣༡ ཉིན། བོད་རང་སྐྱོང་ལྗོངས་ཀྱི་རིམ་པ་གཉིས་པའི་གཞུང་ཞབས་ལས་ཞུགས་རྒྱུགས་ལེན་ཐོ་འགོད་ཀྱི་གསལ་བསྒྲགས་སྤེལ་ཏེ། ཟླ་འདིའི་ཚེས་ ནས་ ཉིན་བར་རྒྱུགས་ཞུགས་མིང་ཐོ་འགོད་པ་དང་ཚེས་ ༡༨ ཉིན་འབྲི་རྒྱུགས་ལེན་དགོས་པ་སྤྱི་བསྒྲགས་བྱས་ཡོད། ཐེངས་འདིར་ཁྱོན་བསྡོམས་ལས་ཞུགས་ས་མིག་ ༢༧༠༤ ཡོད་པའི་ཁྲོད་སྤྱི་ཚོགས་འཕྲོད་བསྟེན་ལས་རིགས་ཐད་ས་མིག་ ༥༦ མ་གཏོགས་སྤྲད་མེད་པ་རེད།
དེ་ནི་ཕྱི་ལོ་ ༢༠༠༩ ལོའི་ས་མིག་ ༡༠༠༠ དང་བསྡུར་ན་ལྡབ་ ༢༠ ཙམ་ཇེ་ཉུང་དུ་ཕྱིན་ཡོད་པར་བརྟེན། ཕྱི་ཚེས་ ཉིན་བོད་ལུགས་གསོ་རིག་མཐར་ཕྱིན་སློབ་མ་ཁག་ཅིག་མཉམ་རུབ་ཐོག་སློབ་གྲྭའི་འགོ་ཁྲིད་རིམ་པ་དང་འབྲེལ་ཡོད་རྩ་འཛུགས་སྡེ་ཁག རང་སྐྱོང་ལྗོངས་འཕྲོད་བསྟེན་ལས་ཁུངས་བཅས་སུ་གནས་ཚུལ་དེའི་སྐོར་ཞུ་གཏུགས་བྱས་མོད། དོན་དམ་ལག་ལེན་གྱི་བསྒྱུར་བཅོས་གང་ཡང་མ་བྱུང་བར་བརྟེན། ཕྱི་ཚེས་ ཉིན་བོད་ལྗོངས་བོད་ལུགས་གསོ་རིག་སློབ་ཆེན་གྱི་སློབ་མ་ ༡༠༠ ལྷག་གིས་ངོ་རྒོལ་གྱི་ལས་འགུལ་འདི་སྤེལ་ཡོད།
སློབ་གྲྭ་འདིར་ད་ལོར་མཐར་ཕྱིན་སློབ་མ་ ༢༥༦ ཡོད་པ་དང་འཕྲོད་བསྟེན་ལས་རིགས་ཀྱི་ས་མིག་ ༥༦ ཡོངས་རྫོགས་སློབ་གྲྭ་འདི་གའི་མཐར་ཕྱིན་སློབ་མ་ཁོ་ནར་ཐོབ་པའི་དབང་དུ་བཏང་ནའང་ད་དུང་མཐར་ཕྱིན་སློབ་མའི་བརྒྱ་ཆ་ ༨༣ ལས་མེད་དུ་འདུག་དགོས་ཆགས་ཡོད།
གཞན་ཡང་སློབ་གྲྭ་འདིའི་བསླབ་གཞི་དག་ནི་བོད་ལུགས་གསོ་རིག་གི་སྐོར་ཡིན་ལ། ལས་ཞུགས་རྒྱུགས་གཞི་ནི་ཆེད་ལས་བསླབ་གཞི་དང་འབྲེལ་མེད་དུ་གྱུར་ཞིང་རྒྱ་ཡིག་ཁོ་ན་ཡིནཔར་མ་ཟད། རྒྱུགས་ཞུགས་སྔོན་འགྲོའི་གཞི་རྩའི་ཆ་རྐྱེན་ལྔ་བཏོན་ཡོད་པའི་དང་པོ་ནི་ཁ་བྲལ་བར་ངོ་རྒོལ་དང་ཏཱ་ལའི་བླ་མར་མཚང་འབྱིན་དགག་རྒྱག་བྱས་ཏེ་བསམ་པའི་འཁྱེར་སོ་དང་ཆབ་སྲིད་ལྟ་བ། ལས་དོན་སྒྲུབ་སྟངས་ཡོད་ཚད་དམར་ཤོག་པའི་ལམ་ཕྱོགས་དང་སྲིད་ཇུས་ལྟར་མཐའ་གཅིག་ཏུ་རྒྱུན་འཁྱོངས་བྱེད་དགོས་པ་དེ་རེད། དེར་བརྟེན། བོད་རིགས་སློབ་ཆེན་མཐར་ཕྱིན་སློབ་མ་དག་ལས་ཞུགས་བྱ་རྒྱུར་རྒྱ་གཞུང་གིས་མངོན་ལྐོག་གཉིས་ནས་དཀའ་ངལ་འཕར་མ་ཞིག་སྤྲད་ཡོད།
ད་ལོའི་ལོ་སྟོད་ལ་བོད་རང་སྐྱོང་ལྗོངས་སྲིད་གཞུང་གིས་སྤྱི་བསྒྲགས་བྱས་པའི་རིམ་པ་དང་པོའི་ལས་ཞུགས་རྒྱུགས་ལེན་བརྒྱུད་གཞུང་ཞབས་ལས་བྱེད་མི་གྲངས་ ༥༠ བསྡུས་ཡོད་པའི་ཁྲོད་མིང་ལ་མཁའ་འགྲོ་ཟེར་བའི་བོད་རིགས་གཅིག་མ་གཏོགས་ཚུད་མེད།
ཕྱི་ལོ་ ༢༠༠༩ ལོའི་རྩིས་ཐོ་ལྟར་ན་བོད་ལྗོངས་བོད་ལུགས་གསོ་རིག་སློབ་ཆེན་ལ་ཁྱོན་བསྡོམས་སློབ་མ་ ༡༥༡༡ ཡོད་པ་དང་བོད་ལུགས་གསོ་རིག་ཆེད་སྦྱོང་བྱ་མཁན་གྱི་སློབ་ཆེན་པ་རྣམས་གཙོས། བོད་ཀྱི་སྐད་ཡིག་རིག་གནས་ཆེད་སྦྱོང་བྱེད་མཁན་གྱི་བོད་རིགས་སློབ་ཆེན་པ་ཡོངས་ཀྱི་ལས་ཞུགས་ས་མིག་ནི་ལོ་རེ་ནས་ལོ་རེར་ཇེ་འཁེགས་སུ་འགྲོ་བཞིན་ཡོད་པ་རེད།
གཞན་ཡང་ཕྱི་ཟླ་ པའི་ཚེས་ ༢༥ ཉིན། པེ་ཅིན་རྒྱ་ལུགས་གསོ་རིག་སློབ་ཆེན་དང་ཅང་ཞི་རྒྱ་ལུགས་གསོ་རིག་སློབ་གླིང་གཉིས་ནས། བོད་ལྗོངས་བོད་ལུགས་གསོ་རིག་སློབ་ཆེན་དུ་ཕྱི་ལོ་ ༢༠༡༠ ལོའི་བོད་ལྗོངས་ཁ་གཏད་རོགས་སྐྱོར་ལ་མིང་རྟགས་འགོད་པའི་ཚོགས་འདུ་ཞིག་བསྡུས་པ་དང་ཕྱི་ཟླ་ ཚེས་ ༡༦ ཉིན་པེ་ཅིན་དང་ཅང་ཞི་ནས་ཡོང་བའི་བོད་སྐྱོར་ལས་བྱེད་མི་སྣ་ཡཱན་ཡུང་ཧུང་དང་ལིས་ཧྥིན། ཁྲེ་ཧྲོ་ཧྭ། ཝན་ཡཱང་བཞི་ནི་བོད་ལྗོངས་བོད་ལུགས་གསོ་རིག་སློབ་ཆེན་གྱི་ཞིབ་འཇུག་སློབ་མའི་སྡེ་ཚན་གྱི་འགོ་གཙོ་གཞོན་པ་དང་བོད་ལུགས་གསོ་རིག་སྡེ་ཁག་གི་འགོ་གཙོ་གཞོན་པ། བ་གྲྭའི་སློབ་གསོ་ལས་དོན་ཁང་གི་འགོ་གཙོ་གཞོན་བཅས་སུ་ཐད་ཀར་སྐོ་འཇོག་བྱས་ཡོད་འདུག

རྩོམ་སྒྲིག་པ་བཞི་ལ་དུས་བཅད་མི་འདྲ་བའི་ཁྲིམས་ཆད།

འདི་ལོའི་ཟླ་གསུམ་པའི་ནང་མི་རིགས་ཁ་བྲལ་རིང་ལུགས་དང་སློབ་མར་ངན་སྐུལ་གྱི་སྣེ་ཁྲིད་བྱས་པའི་ཉེས་མིང་འོག གནམ་ལྕགས་ཚགས་པར་གྱི་རྩོམ་སྒྲིག་པ་བཞི་འཛིན་བཟུང་བཀག་ཉར་དང་ཁྲིམས་ཐག་བཅད་འདུག

དེ་རིང་བཞུགས་སྒར་ངྷ་ས་ཀིརྟི་དགོན་གྱི་གྲྭ་ཀ་ཉག་ཚེ་རིང་ལགས་ཀྱིས་འདི་གར་བཏང་གནས་ལྟར་ན། འདི་ལོའི་ཟླ་གསུམ་པའི་ནང་འབར་ཁམས་མི་རིགས་མཐོ་འབྲིང་གི་སློབ་གྲྭའི་ནང་འདོན་སྤེལ་བྱེད་ཀྱིན་པའི་ ༼ གནམ་ལྕགས་ཚགས་ཤོག་ ༽ ཅེས་པའི་རྩོམ་སྒྲིག་པ་བཞི་འཛིན་བཟུང་བཀག་ཉར་དང་བཙོན་འཇུག་ཁྲིམས་ཐག་བཅད་འདུག

ཁོང་ཚོ་ལོ་འདིའི་ནང་འབར་ཁམས་མི་རིགས་མཐོ་འབྲིང་སློབ་གྲྭ་ནས་སློབ་མཐར་ཕྱིན་གྱི་ཡོད་འདུག

ཁོང་ཚོ་འཇུ་རྐྱེན་གཙོ་བོ་འདི་ལོའི་ཟླ་ ༣ ཚེས་ ༡༧ ཉིན་འབར་ཁམས་མི་རིགས་མཐོ་འབྲིང་སློབ་གྲྭའི་ནང་། བོད་རིགས་སློབ་མ་རྣམས་ཀྱིས་ས་བྱི་ལོའི་ཞི་བའི་གསར་བརྗེར་རྗེས་དྲན་གྱི་འདུ་འཛོམས་བྱས་པ་དང་། གནམ་ལྕགས་ཚགས་པར་སྟེང་དུ་དེ་གའི་སློབ་མ་ཚོས་མི་རིགས་འདྲ་མཉམ་མིན་པ་དང་བོད་ཁུལ་ཡོངས་ལ་རྒྱ་ནག་གཞུང་གིས་གཉའ་གནོན་དང་། བརྙས་བཅོས་འདྲ་མིན་སྣ་ཚོགས་བྱས་པར་སྙན་ངག་དང་འབོལ་རྩོམ་སོགས་རྩོམ་ལུས་འདྲ་མིན་གྱི་ལམ་ནས་དགག་སྒྲུབ་དང་ལྟ་ཚུལ་གསང་བོར་བརྗོད་པར་འབྲེལ་བ་འདུག་ཟེར།

འཇུ་བཟུང་བཀག་ཉར་དང་ཁྲིམས་ཐག་བཅད་པའི་གནམ་ལྕགས་ཚགས་པར་གྱི་རྩོམ་སྒྲིག་པ་བཞི་ནི། བསོད་ནམས་རིན་ཆེན་དང་བསོད་ནམས་དོན་གྲུབ། ཡར་རྒྱས། གྲགས་ལྡན་བཅས་ཡིན་འདུག

རང་ལོ་ ༡༩ ཡིན་པའི་རྩོམ་སྒྲིག་པ་བསོད་ནམས་རིན་ཆེན། འབར་ཁམས་མི་རིགས་མཐོ་འབྲིང་སློབ་གྲྭར་སློབ་གཉེར་བྱེད་བཞིན་པ་དང་འདི་ལོའི་མཐར་ཕྱིན་སློབ་མ་ཡིན། མདོ་སྨད་རྔ་པ་ཁུལ་མཛོད་དགེ་རྫོང་བྱམས་མེ་ཡུལ་ཚོའི་དགའ་ཆོམ་སྡེ་བ་ནས་ཡིན་ཞིང་། ཕ་མིང་ལ་རིན་རྡོར་དང་མ་མིང་ལ་རྟམ་རྡོ་ཟེར། དེང་སྐབས་ས་གནས་གཞན་ཞིག་ཏུ་བསྐྱལ་ཡོད་ཚུལ་ཙམ་ལས་གནས་ཚུལ་གསལ་བོ་ཤེས་རྟོགས་བྱུང་མེད།

རྩོམ་སྒྲིག་པ་ཡར་རྒྱས། མདོ་སྨད་རྔ་པ་ཁུལ་རྔ་པ་རྫོང་གི་ཡིན་ཞིང། འབར་ཁམས་མི་རིགས་མཐོ་འབྲིང་སློབ་གྲྭར་སློབ་གཉེར་བྱེད་བཞིན་པ་དང་འདི་ལོའི་མཐར་ཕྱིན་སློབ་མ་ཡིན། འབར་ཁམས་ནས་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་འདུག་ལ། དེང་སྐབས་ས་གནས་གཞན་དུ་བསྐྱལ་ཡོད་ཚུལ་ཙམ་ལས་གནས་ཚུལ་གསལ་བོ་ཤེས་རྟོགས་མ་བྱུང།

རང་ལོ་ ༡༨ ཡིན་པའི་རྩོམ་སྒྲིག་པ་བསོད་ནམས་དོན་གྲུབ། མདོ་སྨད་རྔ་པ་ཁུལ་མཛོད་དགེ་རྫོང་བྱམས་མེ་ཡུལ་ཚོའི་བུམ་སྐོར་སྡེ་བ་ནས་ཡིན་ཞིང་། ཕ་མིང་ལ་འབྲུག་མཁར་དང་མ་མིང་ལ་འོ་ཕྲུག འབར་ཁམས་མི་རིགས་མཐོ་འབྲིང་སློབ་གྲྭར་སློབ་གཉེར་བྱེད་བཞིན་པ་དང་ད་ལོའི་མཐར་ཕྱིན་སློབ་མ་ཡིན། ད་ལྟ་ད་དུང་འབར་ཁམས་སུ་བཀག་ཉར་བྱས་ཡོད་ཚུལ་ཙམ་ལས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་

རྩོམ་སྒྲིག་པ་གྲགས་ལྡན། མདོ་སྨད་རྔ་པ་ཁུལ་རྔ་པ་རྫོང་གི་ཡིན། འབར་ཁམས་མི་རིགས་མཐོ་འབྲིང་དུ་སློབ་གཉེར་བྱེད་བཞིན་པ་དང་འདི་ལོའི་མཐར་ཕྱིན་སློབ་མ་ཡིན། ད་ལྟ་ད་དུང་བཀག་ཉར་འོག་ཡོད་པ་ལས་གཞན་གནས་ཚུལ་གང་ཡང་ཤེས་རྟོགས་མ་ཐུབ།

ཐེངས་འདིར་ཁོང་ཚོ་བཞིར་ཕོག་པའི་ནག་ཉེས་ཆེ་ཤོས་ནི། འདི་ལོའི་ཟླ་ ༣ ཚེས་ ༡༧ ཉིན་མི་རིགས་ཁ་བྲལ་རིང་ལུགས་དང་སློབ་མར་ངན་སྐུལ་གྱི་སྣེ་ཁྲིད་བྱས་པ་སོགས་ཡིན།

༧གོང་ས་ཏཱ་ལའི་བླ་མའི་མཐོ་རིམ་སློབ་གཉེར་ཁང་།

མི་རིགས་ཀྱི་ཁྱད་ཆོས་ལྡན་པའི་དེང་རབས་རྩོམ་རིག་གི་དཔུང་སྡེ་ཞིག་བསྐྱེད་སྲིང་བྱ་རྒྱུའི་ཧམ་སེམས་བཟུང་ཡོད། རེ་བ་དང་ཕུགས་བསམ་གྱིས་བརྟས་པའི་སློབ་ཕྲུག་མང་པོ་ཞིག་གིས་ཀྱང་ཆེད་དུ་ཁོར་ཡུག་འདི་བདམས་ཏེ་ཡོང་བ་ཡིན་སྟབས། ང་ཚོའི་བར་ཐུན་མོང་གི་འཚོལ་སྙེགས་ཤིག་དང་ཐུན་མོང་གི་ཕུགས་འདུན་ཞིག་ཡོད་ལ། ཐུན་མོང་གི་སྤྲོ་སྣང་ཞིག་དང་ཐུན་མོང་གི་མཛའ་བརྩེ་ཞིག་ཀྱང་ཡོད་སྟབས། ངའི་རྨི་ལམ་དེ་རྨི་ལམ་ཁོ་ན་མིན་པའི་ཡིད་ཆེས་ཡོད་ཟེར།

རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་སྒར་དུ་དམངས་གཙོའི་དུས་དྲན་ཐེངསལྔ་བཅུ་བ་དང་ བོད་གཞུང་དམངས་རྒྱལ་ཡོངས་ཚོགས་ཆེན་ཐེངས་དང་པོ་གཉིས་ཡོངས་སུ་གྲུབ་སྟེ། ཕྱོགས་མཐའ་ཁག་ནས་ཕེབས་པའི་སྐུ་མགྲོན་རྣམས་རང་རང་སར་ལོག་པ་དང་མཉམ་དུ་འདི་གའི་གསར་འགོད་ས་ཀྱང་ལྷོ་ཕྱོགས་སྦེལ་ཀོབ་ཀྱི་ལས་རིམ་མཇུག་བསྡུས་ཏེ་བྱང་ཕྱོགས་ངྷ་རམ་ས་ལར་ལམ་ལ་ཆས ཕྱིར་ལོག་པའི་ལམ་བར་དུ་སྔར་ལོ་གསར་དུ་སྒོ་འབྱེད་བྱས་པའི་ ༧གོང་ས་ཏཱ་ལའི་བླ་མ་མཐོ་རིམ་སློབ་གཉེར་ཁང་ ཞེས་པའི་སློབ་གྲྭའི་འཛུགས་སྐྲུན་དང་ དགེ་ལས་སློབ་ཕྲུག་ཡོངས་ཀྱི་སྤྱིའི་གནས་སྟབས་སོགས་ལ་རྒྱུས་ལོན་ཐེངས་གཅིག་བྱས་པ་ཡིན། ཕྱི་ཚེས་ ཉིན་ནི་གཟའ་ཉི་མར་འཁེལ་ཡོད་སྟབས། གསར་འགོད་པ་མཐོ་སློབས་དེར་འབྱོར་སྐབས་སློབ་གྲྭའི་འགན་འཛིན་བཞུགས་མི་འདུག་ལ། སློབ་ཕྲུག་མང་ཆེ་བ་ཡང་ཕྱི་ལོགས་སུ་ཕྱིན་ཏེ་སློབ་གྲྭ་ཡོངས་ཁ་ཁུ་སིམ་མེར་གནས་འདུག ཏཱ་ལའི་བླ་མ་མཐོ་སློབ་ཀྱི་ཁང་བརྩེགས་དག་ལས་བོད་པའི་སྲོལ་རྒྱུན་གྱི་རྣམ་པ་ཞིག་མངོན་ཞིང་ སློབ་གྲྭའི་ཁོ་ར་ཁོར་ཡུག་ཡངས་ཤིང་རྒྱ་ཆེ་བ་དང་ སློབ་གྲྭ་སྤྱིའི་རྒྱ་ཁྱོན་ཆེ་ཞིང་ཕྱི་རོལ་ཁོར་ཡུག་ལྷིང་འཇགས་ཡིན་པ་བཅས་ཀྱིས་ཞི་བདེ་བག་ཕེབས་ཀྱི་ཚོར་སྣང་ཞིག་བསྟེར་ཐུབ་ཅིང་ སྣང་ཚུལ་འདིས་སློབ་གཉེར་ལ་གཞོལ་མཁན་ཡོངས་ལ་རང་བྱུང་གི་མཐུན་རྐྱེན་ཞིག་བསྐྲུན་འདུག

སློབ་གྲྭ་འདི་ད་དུང་འཆར་འགོད་དཔར་རིས་ལྟར་ལེགས་འགྲུབ་བྱུང་མེད་ཀྱང་། བུའི་ཉལ་ཁང་དང་བུ་མོའི་ཉལ་ཁང་། དགེ་རྒན་གྱི་ལས་ཤག་དང་། ལས་བྱེད་ཀྱི་ལས་ཤག དེ་བཞིན་སློབ་ཁང་དང་ཡིག་ཚང་བཅས་ཡོངས་སུ་འགྲུབ་འདུག གསར་འགོད་པ་ཏཱ་ལའི་བླ་མ་མཐོ་སློབ་བོད་ཡིག་སྡེ་ཚན་གསར་འཛུགས་ཀྱི་འགན་འཛིན་དང་དགེ་རྒན་གཅིག་ལྕོགས་བློ་བཟང་རྒྱལ་མཚན་ལགས་ཀྱི་གམ་དུ་བཅར་ཏེ། སློབ་གྲྭའི་སྐོར་ངོ་སྤྲོད་གནང་རྒྱུར་རེ་བ་ཞུས་དོན་ལྟར་ཁོང་གིས་གསུངས་དོན། ད་ཆར་སློབ་གྲྭ་འདིར་སྡེ་ཚན་ཁག་བཞི་ཡོད། ༢༠༠༨ ལོར་གསར་འཛུགས་གནང་བའི་དམའ་རིམ་དགེ་རྒན་འོས་སྦྱོང་དང་ བོད་ཡིག་སྡེ་ཚན གློག་ཀླད་སྡེ སྔོན་འགྲོའི་དགེ་རྒན་འོས་སྦྱོང་སྡེ་ཚན་གཅིག་བཅས་ཡོད། ད་ཆར་དགེ་རྒན་འོས་སྦྱོང་དང་གློག་ཀླད། བོད་ཡིག་སྡེ་ཚན་བཅས་ལ་ཁྱོན་བསྡོམས་སློབ་ཕྲུག་ ༡༡༧ ཙམ་ཡོད། བོད་ཡིག་སྡེ་ཚན་ནང་འཛིན་གྲྭ་བཅུ་བ་དང་བཅུ་གཉིས་ཐོན་མཁན་ཚོ་བསྡུ་རྒྱུའི་གསལ་བསྒྲགས་བྱས་ཡོད་ཀྱང་ དངོས་སུ་ཐོ་འགོད་བྱེད་མཁན་ ༢༤ དང་ ཆ་རྐྱེན་ཚང་ ཙམ་ལས་བྱུང་ཡོད་པ་མ་རེད། གློག་ཀླད་སྡེ་ཚན་དང་ དགེ་རྒན་འོས་སྦྱོང་སྡེ་ཚན་བཅས་ལ་འཛུལ་མཁན་མང་པོ་འདུག ཅེས་གསུངས་སོང་

ཡང་ཁོང་ལ་སློབ་གྲྭ་འདིར་སློབ་མ་བསྡུ་སྟངས་གང་འདྲ་ཡོད་མེད་དྲིས་པར། མ་འོངས་པར་རྒྱ་གར་རྒྱལ་ཡོངས་འཛིན་གྲྭ་བཅུ་གཉིས་ཀྱི་ལག་འཁྱེར་ཆ་རྐྱེན་ལ་འཇོག་རྒྱུ་རེད། སློབ་ཡོན་སློབ་མ་སོ་སོའི་ཡོང་ཁུངས་ནས་ཐབས་ཤེས་བྱ་དགོས་པ་རེད། སློབ་མ་སུ་ཞིག་ཕེབས་ཀྱང་ཐོག་མའི་ཟླ་བརྒྱད་རིང་མཚམས་སྦྱོར་འཛིན་གྲྭ་ནས་འདུག་དགོས་པ་དང་ དེ་ནས་མཐོ་རིམ་ལོ་གསུམ་བཅས་ཁྱོན་ལོ་གསུམ་དང་ཟླ་བརྒྱད་འདུགདགོས་པ་རེད། ད་ཆར་ང་ཚོས་མཚམས་སྦྱོར་འཛིན་གྲྭའི་སློབ་ཚན་གཏན་འབེབས་ཟིན་ཏེ་ལག་ལེན་བསྟར་བཞིན་ཡོད། མཐོ་རིམ་འཛིན་གྲྭའི་སློབ་ཚན་དེ་ས་རྭ་དང་ཝ་རཱ་ན་སའི་སློབ་ཚན་གཞི་རྩར་བཞག་སྟེབཟོ་མུས་རེད། སློབ་གྲྭ་འདི་ནས་མཐོན་སྐབས་ B A ཡི་ཐོབ་ཐང་ཡོད་པ་རེད། འོན་ཀྱང་ མཐོ་སློབ་འདི་རྒྱ་གར་གཞུང་ལ་དེབ་སྐྱེལ་ཡོད་པའི་ཚོགས་པ་དེ་འདྲ་མིན་སྟབས། ཕྱག་འཁྱེར་ཚད་ལྡན་ཞིག་དང་རྒྱ་གར་གཞུང་གིས་ངོས་ལེན་ཡོད་པ་ཞིག་ཁག་པོ་རེད། ཨ་མ་རྗེ་བཙུན་པད་མས་ཀྱང་ཕྱག་འཁྱེར་གཙོ་བོ་མ་རེད། སློབ་མ་སོ་སོའི་ཤེས་ཡོན་གནས་ཚད་ཀྱིས་སྤྱི་ཚོགས་ནང་ངོས་ལེན་ཡོད་པ་ཞིག་བྱ་དགོས་པ་རེད་གསུངས་ཡོད། མུ་མཐུད་བོད་ཀྱི་རིག་གནས་གང་རུང་ཐོག་རིགས་གཅིག་རྐང་འཛིན་གནང་མཁན་ཡོད་ན་ལམ་ཁ་བསྐྲུན་རྒྱུའི་འཆར་གཞི་ཡོད་པ་རེད། ཅེས་ངོ་སྤྲོད་གནང་སོང་

དེའི་རྗེས་དགེ་རྒན་ལས་ཤག་ཏུ་བསྐྱོད་དེ་སློབ་གྲྭ་འདིར་གསར་དུ་ཕེབས་མ་ཐག་པའི་དགེ་རྒན་ཨ་འཇམ་ལགས་སུ་སློབ་གྲྭ་འདིར་ཐོག་མར་འབྱོར་སྐབས་ཀྱི་གཟིགས་ཚོར་སྐོར་བཅར་འདྲི་ཞུས་སྐབས་ཁོང་གིས། ང་སློབ་གྲྭ་འདིར་འབྱོར་མ་ཐག་ཚོར་སྣང་ཟབ་ཤོས་ཤིག་བྱུང་བ་ནི། སློབ་གྲྭའི་ཕྱིའི་ཁོར་ཡུག་གི་བཀོད་པར་བོད་གངས་ཅན་ཀྱི་ཁོར་ཡུག་ལྟར་རང་བྱུང་ལྷུན་ཆགས་སུ་གནས་པ་དང་སློབ་གྲྭའི་ནང་གི་འཛུགས་སྐྲུན་བོད་པའི་གྲོང་སྡེ་ལྟར་མི་རིགས་ཀྱི་སྲོལ་རྒྱུན་བཟོ་བཀོད་སྤྲས་པ་འདི་དག་རེད། དེ་ནས་སློབ་གྲྭའི་ལས་གནས་སུ་ཞུགས་ཏེ་སློབ་ཁྲིད་བྱེད་སྐབས། ང་བོད་ཡིག་སྡེ་ཚན་གྱི་དགེ་རྒན་རེད། སྡེ་ཚན་དེར་སློབ་མ་བཅུ་གྲངས་ཤིག་ལས་མི་འདུག སློབ་མའི་ཁ་གྲངས་ཉུང་བ་དང་། སློབ་མའི་ཡོང་ཁུངས་ཀྱང་ཤེས་ཡོན་རྩེ་བཏོག་བྱས་པ་དེ་འདྲ་མིན་སྟབས། བསམ་བློ་བརྗེ་རིས་དང་སློབ་སྦྱོང་འགྲན་བསྡུར་གྱི་ཁོར་ཡུག་འཁྲུག་པོ་ཞིག་བསྐྲུན་ཐུབ་རྒྱུ་མ་རེད་སྙམ་པ་ཞིག་བྱུང་སོང་ ཞེས་གསུངས་སོང་

ཡང་ཁོང་ལ་འདི་གའི་སློབ་ཕྲུག་ཚོའི་སྟེང་ནས་རེ་བ་དང་ཡིད་ཆེས་གང་འདྲ་ཞིག་མཐོང་གི་འདུག་གམ་ཞེས་དྲིས་ར། འཛིན་རིམ་བཅུ་གཉིས་ཐོན་པའི་སློབ་མ་ཞིག་གི་ངོས་ཐད་ནས་བསམ་བློ་བཏང་ན། སློབ་མ་ཚོའི་བོད་ཡིག་གི་གནས་ཚད་སྐྱོ་བོ་རེད། འདི་བཙན་བྱོལ་བོད་མིའི་ཤེས་ཡོན་སློབ་གསོའི་ཁྱབ་ཁོངས་སྤྱིའི་གནད་དོན་ཞིག་རེད། ཁོང་ཅག་གི་ཞན་ཆ་དེ་དག་སློབ་གྲྭ་འདི་བརྒྱུད་དེ་ཁ་སྐོང་དང་ཇེ་ལེགས་སུ་གཏོང་མ་ཐུབ་ན། རྗེས་མ་སློབ་གྲྭ་ཐོན་ཏེ་སྤྱི་ཚོགས་ནང་འགྲོ་སྐབས། ཏཱ་ལའི་བླ་མ་མཐོ་སློབ་ཀྱི་མིང་ཆུ་ལ་མི་བསྐུར་བའི་ངེས་པ་མི་འདུག ངས་སློབ་ཕྲུག་ཁོ་རང་ཚོར་ཡང་ཞུས་པ་ཡིན། སློབ་གྲྭ་འདིའི་སྒོ་ཐེམ་ལ་གོམ་པ་དང་པོ་སྤོས་པ་ནས་བཟུང་ལས་འགན་ཆེན་པོ་ཞིག་ཕྲག་ཏུ་བབ་ཡོད། དེ་ནི་བཙན་བྱོལ་ནང་གི་མཐོ་སློབ་ཨང་དང་པོའི་སློབ་ཕྲུག་ཡིན་པ་དང་ དེ་བས་གལ་ཆེ་བ་ནི་སློབ་གྲྭ་འདིའི་མཚན་བྱང་དུ་ཏཱ་ལའི་བླ་འི་མཐོ་སློབ་ཅེས་བཀོད་ཡོད་པ་དེ་བརྗེད་ཉན་གི་མ་རེད། ཅེས་གསུངས་སོང་

ཡང་ཁོང་ལ་ཁྱེད་ཀྱིས་དམིགས་ཡུལ་དང་ཕུགས་རེ་གང་འདྲ་ཞིག་བཟུང་སྟེ་སློབ་ཕྲུག་ཚོར་སློབ་སྦྱོང་སྤྲོད་ཀྱི་ཡོད་མེད་དྲིས་པར། ང་སློབ་གྲྭ་འདིའི་བོད་ཡིག་སྡེ་ཚན་གྱི་དགེ་རྒན་རེད། འཕྲལ་དུ་འགྲུབ་ཐུབ་རྒྱུ་ཁག་པོ་རེད་དེ། ད་བར་བཙན་བྱོལ་ནས་བོད་ཡིག་བོད་སྐད་ཐོག་ཉམས་ཆག་ཕྱིན་ཡོད་པ་མངོན་གསལ་རེད། འདིའི་ཐད་༧གོང་ས་མཆོག་གིས་ཀྱང་ཐུགས་ཕམ་མཛད་ཀྱི་ཡོད་པ་རེད། མ་འོངས་པར་སློབ་གྲྭ་འདི་ནས་རྐང་བཙུགས་ཏེ་བོད་པའི་སྐད་ཡིག་རིག་གནས་དང་། ལྷག་པར་དུ་སྤྱི་ཚོགས་ཧྲིལ་བོའི་བསམ་བློའི་ཀུན་སྤྱོད་ལ་གཡོ་འགུལ་བསླང་ཐུབ་པའི་རྩོམ་རིག་གི་མཐོ་རླབས་ཤིག་སློབ་གྲྭ་འདི་ནས་འཕྱུར་ཐུབ་ན་སྙམ་པ་དང་། མི་རིགས་ཀྱི་ཁྱད་ཆོས་ལྡན་པའི་དེང་རབས་རྩོམ་རིག་གི་དཔུང་སྡེ་གསར་པ་ཞིག་བསྐྱེད་སྲིང་བྱ་རྒྱུའི་ཧམ་སེམས་ཤིག་བཟུང་ཡོད། ཕུགས་བསམ་དང་རེ་བ་ཆེབས་བརྟས་པའི་སློབ་ཕྲུག་མང་པོ་ཞིག་གིས་ཀྱང་ཆེད་དུ་ཁོར་ཡུག་འདི་བདམས་ཏེ་ཡོང་བ་ཡིན་སྟབས། ང་ཚོའི་བར་ཐུན་མོང་གི་འཚོལ་སྙེགས་ཤིག་དང་ཐུན་མོང་གི་ཕུགས་འདུན་ཞིག་ཡོད་ཅིང་ ཐུན་མོང་གི་སྤྲོ་སྣང་ཞིག་དང་ཐུན་མོང་གི་མཛའ་བརྩེ་ཞིག་ཡོད་སྟབས། ངའི་རྨི་ལམ་དེ་རྨི་ལམ་ཁོ་ན་མིན་པའི་ཡིད་ཆེས་ཡོད། ཅེས་གསུངས་སོང་

བོད་ཡིག་སྡེ་ཚན་གྱི་སློབ་མ་བསོད་ནམས་མཚོ་ལགས་སུ་སློབ་གྲྭའི་མཐུན་རྐྱེན་དང་སློབ་སྦྱོང་སྤྲོད་སྟངས་ཀྱིས་འདོད་པ་ཁེངས་པ་ཞིག་ཡོང་གི་ཡོད་མེད་དང་ མ་འོངས་པར་ལས་ཀ་གང་འདྲ་བྱ་འདོད་ཡོད་སྐོར་དྲིས་པར་ཁོ་མོས། ང་རང་ ༡༩༩༨ ལོར་རྒྱ་གར་དུ་ཡོང་སྟེ་མ་སུ་རི་བོད་ཁྱིམ་ནས་འཛིན་གྲྭ་བཅུ་གཉིས་ཐོན་རྗེས་སློབ་གྲྭ་འདིར་འཛུལ་ཞུགས་བྱས་པ་ཡིན། ང་ཆུང་དུས་ནས་བོད་ཡིག་ལ་དགའ་བོ་ཞེ་དྲག་ཡོད། མ་འོངས་པར་བོད་ཡིག་ཐོག་མཁས་པ་ཞིག་བྱ་དགོས་དྲན་བསྡད་པ་དེ་ད་ཆར་ལམ་ཁ་རག་སོང་། སློབ་གྲྭའི་ལ་ལག་དང་ཉལ་ཁང་ ལྷག་པར་དུ་ཁོར་ཡུག་གུ་ཡངས་པོ་དང་ཁུ་སིམ་པོ་ཡོད་པ་འདིས་སློབ་སྦྱོང་ལ་རོགས་འདེགས་ཐུབ་ཀྱི་འདུག སློབ་གྲྭ་འདིནས་བོད་ཡིག་ཐོག་ཁུངས་འཁྱོལ་བ་ཞིག་བཟོ་དགོས་དྲན་ཡོད། མ་འོངས་པའི་ལས་ཀར་བསམ་བློ་གཏོང་གི་མེད། དེ་སེམས་ཁྲལ་ཡང་ཡོད་རྒྱུ་མ་རེད་དྲན་ཡོད། གང་ཡིན་ཟེར་ང་ཚོ་སྐལ་བ་བཟང་པོ་རེད། ཏཱ་ལའི་བླ་མ་མཐོ་སློབ་ཀྱི་སློབ་མ་སྐབས་དང་པོ་ཡིན་ལ་སྦྱང་བྱ་ཡང་བོད་ཡིག་རིགས་གཅིག་རྐང་འཛིན་རེད། སློབ་གྲྭ་དང་སློབ་ཚན་གྱི་ཐད་ནས་སོ་སོར་སྤོབས་པ་ཡོད། རང་གི་སློབ་སྦྱོང་གི་ཆུ་ཚད་ཀྱིས་མ་འོངས་པའི་ལས་ཀ་ཐག་གིས་གཅོད་གི་རེད། ཅེས་ཤར་མར་བརྗོད་བྱུང་

ཡང་སློབ་ཕྲུག་བློ་བཟང་ཆོས་སྒྲོན་ལགས་སུ་མཐོ་སློབ་འདིར་ཞུགས་རྒྱུའི་དམིགས་ཡུལ་གང་ཡིན་དངསྐོར་བཅར་འདྲི་ཞུས་པར་ཁོ་མོས། ང་རང་སློབ་གྲྭ་འདིའི་དགེ་རྒན་འོས་སྦྱོང་ལོ་རིམ་དང་པོའི་ནང་། ཚན་རིག་དང་སྤྱི་ཚོགས་རིག་གནས། རྩིས་རིག་སོགས་ལ་སློབ་སྦྱོང་བྱེད་ཀྱི་ཡོད། སྔོན་མ་ངའི་ཕུ་བོ་སློབ་གྲྭ་འདི་ནས་དགེ་རྒན་འོས་སྦྱོང་ཐོན་པ་རེད། ཁོས་སློབ་གྲྭ་འདི་ཡག་པོ་ཡོད་པ་རེད་ལབ་ཏེ། ང་སློབ་གྲྭ་འདིར་ཞུགས་པ་ཡིན། མ་འོངས་པར་རྩིས་རིག་དགེ་རྒན་ཞིག་བྱ་དགོས་བསམ་ཡོད། ༢༠༠༩ ལོར་ང་རང་སློབ་གྲྭ་འདིར་འབྱོར་སྐབས་ཁོར་ཡུག་ཚང་མ་སྟོང་པ་རེད། མཐོ་སློབ་ཅིག་ཏུ་སླེབས་པའི་ཚོར་བ་མི་འདུག སློབ་གྲྭ་འཛུགས་སྐྲུན་བྱེད་མཁན་གྱི་འཕྲུལ་འཁོར་གྱི་སྒྲ་ཆེན་པོ་འདུག ཧ་ཅང་སུན་པོ་བྱུང་སོང་ལ། དགེ་རྒན་གྱི་སློབ་ཁྲིདཡངགོ་ཐུབ་ཀྱི་མི་འདུག ལྷག་པར་དུ་སློབ་གྲྭའི་ཁོར་ཡུག་ན་ཚོང་དང་ཟ་ཁང་གཅིག་ཀྱང་ཡོད་པ་མ་རེད། སྐབས་རེར་རྔན་པ་ཉོ་ས་མེད་པའི་དཀའ་ངལ་ཡང་འཕྲད་ཀྱི་འདུག་ཅེས་བརྗོད་སོང་

ད་སྐབས་རྒྱའི་བཙོན་འོག་ཡོད་བ

ད་སྐབས་རྒྱའི་བཙོན་འོག་ཡོད་བ
འཇམ་དབྱང་བསྟན་པ་ལགས།

ད་སྐབས་རྒྱའི་བཙོན་འོག་དུ་ཡོད་པ།

ད་སྐབས་རྒྱའི་བཙོན་འོག་དུ་ཡོད་པ།
གྲྭ་ཆོས་གྲགས་རྒྱ་མཚོ་ལགས།

རྡོ་རྗེ་གདན་གྱི་བོད་ཀྱི་་གངས་ལྷ་ཟ་ཁང་གསར་བ་སྒོ་འབྱེད་བྱས་ཡོད།

རྡོ་རྗེ་གདན་གྱི་བོད་ཀྱི་་གངས་ལྷ་ཟ་ཁང་གསར་བ་སྒོ་འབྱེད་བྱས་ཡོད།

རྒྱ་དམར་གྱིས་བོད་མི་ཉེས་མེད་གསོད་རྭར་ཁྲིད་བཞིན་པ།༼༡༩༦༣ལོ༽

རྒྱ་དམར་གྱིས་བོད་མི་ཉེས་མེད་གསོད་རྭར་ཁྲིད་བཞིན་པ།༼༡༩༦༣ལོ༽
རྒྱ་མིའི་བོད་ལ་སྤད་པའི་བདེ་སྐྱིད།

བོད་མི་ཉེས་མེད་དམར་གསོད་གཏོང་བཞིན་པ།༼༡༩༦༣ལོ༽

བོད་མི་ཉེས་མེད་དམར་གསོད་གཏོང་བཞིན་པ།༼༡༩༦༣ལོ༽
མི་ལོ་ལྔ་བཅུའི་བཅང་གྲོལ་གྱི་རྣམ་པ།

ཟུངས་ཁྲག་གི་མཆོད་པ།

ཟུངས་ཁྲག་གི་མཆོད་པ།